小心為上

仲有兩個禮拜就半年結，策略上可能要小心啲，唔排除有基金經理係會沽貨鎖定利潤。港股上半年指數表現算係唔錯，但兩極分化好明顯，王中王騰訊(0700)、新晉藍籌吉利汽車(0175)跑贏成條街，舊經濟嘅中海油就輸到甩褲。對於呢啲跑贏好多嘅股份係半年結前唔排除會有profit-taking嘅動作。

昨日恒生指數繼之前跌穿10天線之後，20天線都穿埋，50天線而家大概係兩萬五千點，試一試都唔出奇。

自己組合揸差唔多50%現金，所以唔會再去刻意大舉減持，反而會利用未來兩個星期嘅時間觀察下有邊啲股份疾風知勁草。

今年上半年成績比較滿意，得益於第一季重倉吉利第二季重倉融創(1918)。吉利已經沽清，因為原先設定2018年嘅目標15蚊今年上半年已經達到，但係如果有個似樣嘅調整不排除重新上車。依家融創同騰訊叮噹馬頭，係組合頭兩大持倉。第三季或者下半年嘅心水，暫時未有。