開緊派對 記住著褲

開緊party叫人離場猶如阻人發達，下一句大家明。

我都唔敢離場，不過高追的危險動作就算了。市況頗有2015年大時代feel，不過一個顯著區別係15年熱炒小盤股，今次係龍頭大價股為主。純粹個人意見，我比較反對追落後，係就等龍頭回落少少追入去。多年經驗話我聽，追落後多數時候唔係好主意。

舉個例子，今日就趁小米(1810)回落加返少少倉，16,000股@三條三。UBS叫沽，但係啲理據有少少為賦新詞強說愁感覺。比亞迪(1211)都pull back，倉位已經夠大就沒再加。物管揚眉吐氣，內房則繼續半死不活。

狹路相逢勇者勝，但難拿捏的是幾勇，只心口寫個勇字容易成為刀下鬼。我稍傾向保守一點，最差結果是少賺，但要確保退潮時候仍著住泳褲。