連升幾時斷纜 精選個股王道

係唔係要保守啲，打返啲防守，已經成為過去幾個月一去到月底必問自己嘅問題，今個月也不例外。

恒指已經連升七個月，累計升差唔多五千點或者兩成三，會唔會連升八個月？8月尾咪知囉。重要嘅唔係估唔估到會唔會連升八個月，而係操作同心態上點樣去應對。

我自己嘅應對方法係唔會去做對沖（因為好多時係倒錢落咸水海），而係揸比較高比例嘅現金。過去兩三個月自己組合現金比例好少低過兩成，有時甚至去到三成。咁咪好嘥？表面睇是，如果全倉持貨嘅話回報會更加好，但咁樣會增加自己嘅心理壓力，做唔到應對自如。夜晚訓覺訓得安穩，保持良好作戰狀態，其實都係投資重要一環。

彌补方法是精選個股，只要你重倉嘅股票能夠跑贏大市，就可以解決現金水平偏高嘅問題。幸運的是，重倉股騰訊(0700)舜宇(2382)融創(1918)奧園(3883)吉利(0175)最近幾個月都有唔錯表現。

下個禮拜開始進入中期業績期，又到火眼金睛時刻，去蕪存菁是指定動作。之前講過，心態保守和操作進取其實並無矛盾之處，搶攻之餘隨時準備策略性撤退。

下個禮拜組合持有倉位較重股票公佈業績主要是星期一信義玻璃(0868)。信義7月20日創52週新高8.42，ytd升兩成六，只是麻麻（平常年份嘅話其實好好，沒有對比就沒有傷害），中期業績如果唔係太過搶眼，會酌量減啲。