舜宇兩天兩成四 計數買貨無走雞

舜宇(2382)出盈喜前市場consensus係估今年全年大概賺21億，上半年賺8億，但係佢一盈喜即刻將上半年盈利推高到至少10億，呢個同市場原先估計有25%分別。

盈喜之後市場嘅平均預測已經好快提高到26-28億，以舜宇兩日狂升兩成四之後嘅一千億港錢市值計，大概trade緊今年32倍市盈率，都係唔貴。如果roll over到2018-2019年，以中銀國際為例，預測賺39億同埋49億，預測市盈率就進一步下跌到23同18倍。

舜宇每個月都會公佈旗下產品出貨數字，包括手機鏡頭、手機鏡頭模組和車載鏡頭等等，實際盈利比市場預測高出咁多說明好大機會係毛利率嘅提升。呢個係powerful嘅組合，revenue＋margin雙提升。

宜家要做嘅係克服不願意追高的心態，可能你會覺得點解兩日前七十四五蚊我唔買依加90幾先追，咁咪好唔抵。買股票永遠係向前唔係睇後，唔使即時睇得麥格理咁高140，但係紅底股應該冇走雞。

題外話一句，麥格理升舜宇目標去到140，應該會引起唔少人關於UBS當年睇神華101嘅記憶，只可以講，今時唔同往日，唔可以引喻失義。