輪動模式繼續 普普金仔嘴炮

港股繼續輪動模式，好似今日國指調整差唔多1%，內銀同內險都pull back，但上個禮拜調整咗嘅內房、汽車同埋手機相關個股就繼續回勇，例如融創(1918)兩日升6.8%，吉利(0175)四日升一成一，舜宇(2382)四日升7.1%。

短期（直至下個星期)可能繼續騰訊(0700)一支箭，滙豐(0005)間中幫下手，指數繼續進兩步退一步向28000邁進，身手敏捷嘅固然可以跟住板塊輪動，揸住強勢股嘅繼續坐定定亦無不可，總之做乜都好就係唔好做淡友。

普普啱啱講fire and fury 唔夠一個鐘，金仔已經話要搞關島美軍基地，堂堂大美國情何以堪。雖說兩條友淨係吹水，但咁搞落去始終有一日會出事，當然唔會依家。反而大陸佬可能有口齒，出咗“勿謂言之不預”，假如印度佬不識相，可能來真的。

中國人歷來講究言而有信、一言九鼎、君子一言、無信不立、言出必行，阿三應該唔多識中國文化，到時後悔莫及。目前個市相當complacent，對呢啲地緣政治風險完全視而不見，呢個亦都係點解自己雖然睇好短線市況仍然揸兩成以上現金嘅原因。

自己唔係幾明點解九倉(0004)升成咁，分拆雖然有助釋放價值，但係調返轉頭分拆後控股公司就會有控股折讓。真想put佢，不過當然唔會咁做，亦都冇工具。