小時代而已

上週最失敗嘅操作一定係沽清咗舜宇(2382.HK)，最成功係大手買入銀娛(0027.HK)同埋金沙(1928.HK)博rotational buying同埋二月份嘅GGR有改善。

個市暫時都好超買特別係國指，但係超買之後係可以再超買，咁就不如等下佢先試24000點，嗰個位附近就會比較積極出貨，甚至買啲國指put搏一搏佢會回調囉。

依家開始有啲人講大時代，但依家邊有大時代嘅條件呢？15年大時代好明顯由A股帶起，有所謂“國家牛市”嘅大背景，跟住嗰啲人就開始心雄。 依家係冇呢個條件嘅，所以恆指返舊年9月高位甚至升至兩萬五就唔出奇，但幻想今年再來一次大時代就不切實際囉，起碼響依家嚟睇。

開始有啲大股東出貨嘅情況，譬如今日嘅俄鋁(0486.HK)。呢啲係初步警告，跟住落來如果再有啲開動抽水機大肆抽水嘅動作，咁呢一浸由12月尾開始嘅反彈可能都差唔多啦。其實依家開始take啲profit都係ok嘅，冇理由錢全部畀你賺盡嘛。

吉利(0175.HK)染藍可能標誌股價由“升到你唔信”轉mode到“升到你迷信”，之前有一篇文話《下車容易上車難》，如果不是身手敏捷不如坐定定。